Mga Awit 146

Pagpupuri sa Diyos na Tagapagligtas

¹Purihin si Yahweh!

Purihin mo si Yahweh, O aking kaluluwa!

²Pupurihin siya't aking aawitan;

aking aawitan habang ako'y buháy.

³Sa mga pangulo'y huwag kang manghahawak,

kahit sa kaninong di makapagligtas;

⁴kung sila'y mamatay, balik sa alabok,

kahit anong plano nila'y natatapos.

⁵Mapalad ang tao, na ang kanyang Diyos na laging katulong ay ang Diyos ni Jacob;

sa Diyos na si Yahweh, umaasang lubos,

⁶sa Diyos na lumikha niyong kalangitan,[#Gw. 4:24; 14:15.]

ng lupa at dagat, at lahat ng bagay.

Ang kanyang pangako ay maaasahan.

⁷Panig sa naaapi, kung siya'y humatol,

may pagkaing handa, sa nangagugutom.

Pinalaya niya ang mga nabihag;

⁸isinasauli, paningin ng bulag;

lahat ng inapi ay itinataas,

ang mga hinirang niya'y nililingap.

⁹Isinasanggalang ang mga dayuhang sa lupain nila'y doon tumatahan;

tumutulong siya sa balo't ulila,

ngunit sa masama'y parusa'ng hatid niya.

¹⁰Walang hanggang Hari, ang Diyos na si Yahweh!

Ang Diyos mo, Zion, ay mananatili!

Purihin si Yahweh!