Mga Awit 127

Pagpupuri Dahil sa Kabutihan ng Diyos

¹Maliban nga na si Yahweh ang nagtatag nitong bahay,

ang ginawa ng nagtayo ay wala ring kabuluhan;

maliban nga na si Yahweh ang sa lunsod ay gumabay,

ang pagmamasid ng bantay ay wala ring saysay.

²Hindi dapat pakahirap, magpagal sa hanapbuhay;

maaga pa kung bumangon, gabing-gabi kung humimlay,

pagkat pinagpapahinga ni Yahweh ang kanyang mahal.

³Kaloob nga ni Yahweh itong ating mga anak,

ang ganitong mga supling, pagpapalang mayro'ng galak.

⁴Ang lalaking mga anak sa panahong kabataan,

ang katulad ay palaso sa kamay ng isang kawal.

⁵Mapalad ang isang taong mapalasong tulad niyan,

hindi siya malulupig, at malayo sa kahihiyan,

kung sila man ng kalaban ay magtagpo sa hukuman.